“Gong, cangkriman yuk”
“Oke Kang, ning ojo sing saru saru lho”
“Ora arep saru, mung nyrempet-nyrempet ae. Ning jane masalah saru kuwi tergantung karo sing nangkep lho Gong. Lha nek pikirane wis ngeres, yo apa-apa dibayangke lan diarahke bab persaruan. Sanadyan to ngrembuk masalah sing tabu, ning nek panggonane lan sing padha rembugan kuwi kabeh wis ngerti, yo aman-aman wae to Gong”
“Iyo, mangkane nek omong-omong sing jorok luwih becik cerak peceren wae, yo ra Kang”
“Iya ra ngono, kuwi rak terlalu sarkastis”
“Apa kuwi sarkastis?”
“Terlalu kasar, ngono”
“Lha peceren kan ana sambung rapete karo barang-barang sing jorok to Kang”
“Iya bener, ning mosok ngobrol ning cerak peceren, yo ora wangun to. Lha nek rembugan ki yo cerak septitank wae no, he he he”
“Padha wae kang, lha kuwi rak malah luwih mambu to. Ayo Kang, apa cangkrimanmu?”
“Oke Gong, aku tak nembang pangkur yo
Badhénên cangkriman ingwang
tulung-tulung ana gêdhang awoh gori
ana pitik ndhasé têlu
gandhènana êndhasnya
kyai dhalang yèn mati sapa sing mikul
ana buta nunggang grobag
sêlawé sunguting gangsir
Apa kuwi Gong?”
“Wah nek masalah per-tembang-an aku rada ra dong kuwi”
“Halah … alasan Gong, ngomong wae yen ra ngerti”
“Ya ra ngerti aku, terus apa jawabane cangkriman kuwi Kang?”
“Ana gêdhang awoh gori, ning kene gori dudu woh nangka, gori kuwi maksude ditegori, ditebang, dadi ana gêdhang awoh trus ditegori.
Ana pitik ndhasé têlu, têlu kuwi dibuntel wulu, dibungkus wulu. Bener kan ndhasé pitik ana wulune.
Dhalang kuwi kadal lan walang, buta kuwi tebu ditata. Bacute mbok artekno dhewe”
“He he he … bener ugo yo. Saiki gantian Kang, geplak wedang jahe, apa Kang”
“Apa kuwi Gong”
“Geplak wedang jahe, bareng penak meneng wae. Pindang Kutut apa Kang”
“Mboh”
“Pindang kutut, Sapi mblandang, lukune katut. Lha iki apa Kang, wujudé kaya kêbo, ulêsé kaya kêbo, lakuné kaya kêbo, nanging dudu kêbo, apa kuwi Kang”
“Lha apa Gong ?”
“Gudhel no. Ngarep ireng, mburi ireng sing tengah methentheng, apa kuwi Kang”
“Kuwi kowe kuwi …sarwa ireng Gong !”
“He he he … lha kok kok nesu. Kuwi wong mikul areng no. Wis ah mengko maneh”
Filed under: Guyon Maton Pesbuk Tagged: bagong, guyon maton
